डहाणू : ग्रामीण भागातील मुलांमध्ये सुप्त कलागुण असतात; मात्र ते प्रकट व्हायला माध्यम व योग्य मार्गदर्शन मिळणे आवश्यक असते. हेच लक्षात घेऊन पेण सहयोग फाउंडेशनने पालघर जिल्ह्यातील डहाणूमधील दाभोण पिलाणपाडा येथील जिल्हा परिषद शाळेत विशेष कार्यक्रम आयोजित केला होता. पणत्या कशा रंगवाव्यात आणि कशा सजवाव्यात, याची प्रात्यक्षिके दाखवून मुलांना ते करण्याचा प्रत्यक्ष अनुभव देण्यात आला.
या कार्यक्रमात परिसरातील पहिली ते आठवीच्या २०० ते ३०० विद्यार्थ्यांनी सहभाग घेतला होता. आलेल्या पाहुण्यांचे विद्यार्थ्यांनी लेझीम खेळून स्वागत केले. सर्व शिक्षक आणि प्रतिनिधींमार्फत छोटे छोटे गट तयार करून प्रत्येक विद्यार्थ्यासाठी पणती, रंग, ब्रश आणि सजावटीचे साहित्य देण्यात आले. कलाशिक्षक महेश काचरे यांच्या मार्गदर्शनाखाली मुलांना रंगांची ओळख करून देण्यात आली. सर्व शिक्षक प्रतिनिधींच्या सहकार्याने चिमुकल्या विद्यार्थ्यांनी उत्कृष्ट रीतीने मनमोहक रंगकाम आणि सजावट करून पणत्या रंगवण्याचा मनमुराद आनंद लुटला.
या कार्यक्रमासाठी पेण सहयोग फाउंडेशनचे संचालक योगेश सावे आणि टीम, कलाकार महाराष्ट्र उपक्रम मार्गदर्शक महेश काचरे, भावेश काचरे, दाभोण केंद्रातील शिक्षक, विद्यार्थी व पालक आवर्जून उपस्थित होते. ग्रामीण भागातील मुलांना असे कलात्मक उपक्रम साहित्यानिशी कधीच शिकायला मिळत नाहीत. ते मिळावेत, यासाठी असे कार्यक्रम विविध संस्थांनी ग्रामीण भागात आवर्जून राबविणे नितांत गरजेचे आहे, असे महेश काचरे यांनी सांगितले.
